Одбојкарот Ристо Николов од екипата на „Џио“ од Струмица и член на македонската одбојкарска репрезентација е избран за најдобар струмички спортист на манифестацијата „Спортист на годината“ која синоќа се одржа во Струмица.

За најдобар тренер е прогласен Југослав Тренчовски од „Академија Пандев“, а најдобра екипа е актуелниот одбојкарски шампион и освојувач на купот-екипата на „Џио“ – Струмица.

„Ми беше чест што бев заедно со најдобрите и на спортистите кои беа прогласени за најдобри во сите категории им посакувам уште поголеми успеси во оваа година.“ изјави градоначалникот Коста Јаневски, кој на манифестацијата им ги врачи наградите на избраните спортисти.

Во организација на средното стручно училиште НПГ „Димитар Талев“ од градот Гоце Делчев, Република Бугарија, викендот се одржа маратонот „Неврокоп трча“ на кој што учествуваа 150 натпреварувачи во четири категории, учествуваа и 14 ученици од основни и средни училишта од Струмица.

Во категоријата основни училишта првото место го освои Симона Кирова, а второто Викторија Трајкова и двете ученички од ООУ „Никола Вапцаров“ и во категоријата средни училишта второто место го освои Елена Стојкова од СОУ „Никола Карев“ и третото место Никола Сирачев од СОУ „Димитар Влахов“.

Средното општинско училиште „Никола Карев“ има воспоставено соработка со средното училиште НПГ „Димитар Талев“ и на 23 октомври ќе го посетат училиштето и ќе разменат искуства за образованието, а возвратната посета во Струмица е планирана за во ноември годинава.

На овогодинешното Европско првенство во одбојка кое се одржа во Љубљана, Словенија, од 15 репрезентативци, 9 беа струмичани.

Иако екипата на Македонија не успеа да се пласира во осминафиналето, тие издвоија две значајни победи од кои една против домаќинот Словенија и ја кренаа македонската јавност на нозе.

Одбојкарите вчера попладне пристигнаа во Скопје каде беа пречекани од бројни обожаватели и со музика од оркестарот на Џамбо Агушев.